Utos ng DILG sa mga LGU: palakasin ang programa kontra rabies, tradisyunal na “tandok” mahigpit na ipagbawal

Inatasan ng Department of the Interior and Local Government ang local government units na mas paigtingin pa ang pagpapatupad ng rabies prevention at control measures batay sa isinasaad ng Anti-Rabies Act of 2007.

Kasunod ito ng pahayag ng Department of Health na kahit may pagbaba sa naitalang rabies cases mula Enero hanggang Agosto a-dos ngayong taon ay hindi dapat maging kampante ang LGU at publiko.

Ayon sa DILG malinaw naman ang nakasaad sa Republic Act 9482 sa responsibilidad ng mga LGU kabilang ang pagkakaroon dapat ng beterinaryo sa lahat ng mga lalawigan, lungsod at first-class municipalities.

Dapat ding may ordinansa ang mga LGU para ma-pondohan ang kanilang National Rabies Prevention and Control Program.

Pinatitiyak din ng DILG sa mga lokal na pamahalaan na mahigpit na ipatupad ang pagbabawal sa paggamit ng tradisyunal na “tandok” bilang panlaban sa rabies.

Ayon sa ahensya, dapat magsagawa ng mass dog vaccination, registration, pagkontrol sa mga pakalat-kalat na hayop, pagsusulong ng responsableng pet ownership at pagbabawal sa dog trading. (DDC)