CWC hanga sa ipinakitang tapang ni Liza Soberano

Bumilib ang Council for the Welfare of Children sa tapang na ipinakita ng aktres na si Liza Soberano nang ikwento nito kamakailan ang pang-aabusong sinapit niya noong siya ay bata pa.

Ayon sa CWC ang istoryang ito ni Liza ay masakit na reyalidad na marami sa mga kabataang Pinoy ang nakararanas ng trauma habang sila ay lumalaki.

Paalala ito ayon sa CWC na kailangang palakasin pa ang protective mechanisms para masigurong bawat bata ay lumalaki sa ligtas, mapagmahal at supportive environment.

Ayon sa komisyon, ang childhood trauma lalo na kung mula sa mapang-abuso o pabayang magulang ay nagdudulot ng mahabang epekto sa development at mental health ng mga bata at dala-dala nila ito hanggang pagtanda.

Kaugnay nito ay nanawagan ang CWC sa lahat ng sektor ng lipunan na maging proactive sa pagtugon sa mga kaso ng child abuse at neglect.

Kung mayroong impormasyon tungkol sa batang nakararanas ng pang-aabuso, diskriminasyon o pagpapabaya, maaaring makipag-ugnayan sa MAKABATA Helpline 1383. (DDC)