Mga residente sa Old Antipolo Road sa Maynila hindi maaapektuhan ng North-South Commuter Railway

Tiniyak ng Department of Transportation na hindi paaalisin ang mga residente na nakatira sa Old Antipolo Road sa Maynila kahit madaraaanan ito ng North-South Commuter Railway.

Sinabi niDOTr Secretary Vince Dizon, babaguhin na lamang ang disenyo ng konstruksyon ng tren sa nasabing lugar para hindi na kailangang i-relocate ang nasa limampung (50) residente at maging ang isang simbahan sa kalyeng daraanan ng Commuter Railway.

Ayon kay Dizon, iniutos ni Pangulong Ferdinand Marcos Jr. na tiyakin ang kapakanan ng mga residente sa lugar.

Sinabi ni Dizon na kumitid na ang kakailanganing right-of-way ng proyekto kaya hindi na kailangang alisin ang mga bahay at iba pang istraktura.

Dagdag pa ng kalihim, patuloy makikipagtulungan ang DOTr kay Manila Mayor Isko Moreno at sa Manila City government para siguruhing tama ang right-of-way at relokasyon para sa ibang maaapektuhan ng proyekto. (DDC)