Paghahatid ng suplay sa mga mangingisda sa Bajo de Masinloc naisagawa ng Coast Guard sa kabila ng pambu-bully ng mga barko ng China

Matagumpay na naisagawa ng ng Philippine Coast Guard ang “Kadiwa para sa Bagong Bayaning Mangingisda” o KBBM program sa Bajo de Masinloc na layong hatiran ng suplay ang mga mangingisdang Pinoy.

Sa kabila ito ng naranasan ng Coast Guard na pangha-harass at pambu-bully mula sa mga barko ng China na kalaunan ay nagresulta pa sa banggaan ng Chinese Coast Guard Vessel at ng barko ng Chinese People’s Liberation Army-Navy.

Sinabi ni Coast Guard Spokesperson for the West Philippine Commodore Jay Tarriela mahigit 30 mangingisdang Pinoy sa Bajo De Masinloc ang nabigyan ng fuel subsidies at suplay ng yelo.

Sa paghahatid ng suplay sinabi ni Tarriela na maipagpapatuloy ng mga mangingisdang Pinoy ang kanilang paglalayag.

Ang presensya ng barko ng Coast Guard sa Bajo de Masinloc ay makatutulong din para maramdaman ng mga mangingisda na ligtas silang makakapaglayag at makakapaghanap-buhay sa kabila ng pambu-bully ng mga barko ng China. (DDC)