Las Piñas City kabilang sa mga kinilala bilang “highly functional” LGUs sa Metro Manila sa pagsusulong ng karapatan ng kababaihan at kabataan

Bilang bahagi ng tagumpay ng buong National Capital Region o Metro Manila, kinilala ang Pamahalaang Lungsod ng Las Piñas bilang isa sa 17 local government units (LGUs) na nakatanggap ng “Highly Functional” rating sa 2025 Local Committees on Anti-Trafficking and Violence Against Women and their Children (LCAT-VAWC) Functionality Assessment.

Ito ay pagkilala sa aktibong pagtupad ng lungsod sa mga programang laban sa human trafficking at karahasan sa kababaihan at kabataan, sa pangunguna ng Department of the Interior and Local Government (DILG-NCR) at ng Regional Inter-Agency Monitoring Team.

Nasungkit ng Las Pin̈as ang 100% Highly Functional na testamento ng kanyang hindi matatawarang pangako sa NCR LGUs na protektahan ang mga bulnerableng mamamayan nito.

Ang tagumpay na ito ay nakahanay sa mandato ng DILG na siguruhing epektibo at mahusay na paghahatid ng serbisyo publiko, na nagsisilbing sandata at pagkilos ng LGUs bilang mahalagang frontliners sa pagpapatupad ng mga programa at batas ukol sa panlipunang proteksiyon, kaayusan, at kaligtasan ng tao.

Ang parangal ay patunay ng patuloy na pagtutok ng Las Piñas sa maayos, makatao, at makatarungang pamamahala para sa mas ligtas at inklusibong komunidad. (Bhelle Gamboa)