Walong branch ng kumpanyang Visa to America ipinasara ng DMW

Ipinasara ng Department of Migrant Workers ang walong tanggapan ng Visa to America Manila Inc. na matatagpuan sa Pasig City, Cebu City, Lucena City, Iloilo City, Santiago City, Quezon City, Davao City, at Zamboanga City.

Ang Visa to America na isang visa consultancy firm ay natuklasan ng DMW na sangkot sa illegal recruitment at nag-aalok ng trabaho bilang guro sa Estados Unidos nang walang karampatang lisensya o otorisasyon mula sa DMW.

Batay sa reklamo ng isang biktima, sinisingil siya ng P300,000 para sa J-1 visa package at P500,000 para sa H-1B visa package para makaalis siya at makapagtrabaho bilang guro sa US.

Natuklasan din na ang mga empleyado ng Visa to America ay nagpapanggap na kinatawan mula sa mga eskwelahan sa US at nagsasagawa ng pekeng job interview sa mga aplikante.

Sasampahan ng kasong illegal recruitment ang mga opisyal ng kumpanya at sasailalim na din sila sa List of Persons with Derogatory Record ng DMW. (DDC)