Kalihim ng DSWD at DOH katuwang ni Mayor Aguilar sa relief operations para sa mga apektadong pamilya sa Las Piñas City
Pinangunahan ni Las Piñas City Mayor April Aguilar ang relief operations para sa mga inilikas na pamilya na pansamantalang nanunuluyan ngayon sa Zapote Elementary School kasunod ng matinding pagbaha sa lungsod.
Kasama ng alkalde sina Department of Social Welfare and Development (DSWD) Secretary Rex Gatchalian at Department of Health (DOH) Secretary Ted Herbosa.
Nasa kabuuang 151 na pamilya o katumbas ng 549 na indibiduwal ang nakatanggap ng food packs at mga mahahalagang supplies mula sa DSWD bilang parte ng patuloy na pagtugon sa nakaraang pagbaha na dulot ng malalakas na pag-ulan.
Layunin ng operasyong ito na bigyan ng agarang tulong ang mga apektadong residente na pansamantalang tumutuloy sa naturang eskwelahan.
Bukod sa relief goods, nagbigay naman ang DOH ng medical assistance sa pamamagitan ng pamamahagi ng mga vitamins at antibiotic prophylaxis upang maiwasan ang paglaganap ng mga impeksiyon sa mga evacuees. Tumulong din ang mga health personnel para alamin ang kinakailangang medikal at nag-alok ng suporta kung paano makakaiwas sa mga sakit lalo na ang mga bata at bulnerableng indibiduwal.
Personal na umasiste si Mayor Aguilar sa naturang pamamahagi at nakipag-ugnayan sa national officials at local departments kabilang ang City Social Welfare and Development Office at City Health Office para tiyakin ang maayos na paghahatid ng mga serbisyo.
Patuloy ang lokal na pamahalaan sa pakikipagtulungan sa mga ahensiya ng gobyerno upang imonitor ang sitwasyon at tugunan ang lumalaking pangangailangan ng mga apektadong komunidad. (Bhelle Gamboa)
