Coast Guard pumalag sa akusasyong “planted” ang mga sakong nakukuha sa Taal Lake

Pinalagan ng Philippine Coast Guard (PCG) ang mga akusasyon sa social media na “planted” ang mga sakong nakukuha nila sa nagpapatuloy na operasyon sa Taal Lake para mahanap ang labi ng mga nawawalang sabungero.

Sa panayam sinabi ni PCG Southern Tagalog Commander Geronimo Tuvilla, na hindi biro-biro ang ginagawa ng mga diver ng Coast Guard dahil nakalagay sa peligro ang kanilang buhay tuwing isasagawa nila ang operasyon.

Hindi rin aniya sila mag-aaksaya ng panahon at hindi ibubuwis ang kanilang buhay kung gawa-gawa lamang at hindi totoo ang operasyon.

Ayon kay Tuvilla, ang laman naman ng mga nakukuha nilang sako ay sasailalim pa sa forensic examination para malaman kung ang mga ito nga ay labi ng mga nawawalang sabungero.

Hindi rin aniya simpleng krimen ang pinag-uusapan dito, at ang hakbang na ito ng PCG particular ng kanilang mga diver ay layong matuldukan na ang paghihirap ng kalooban ng mga pamilyang naulila ng “missing sabungeros”. (DDC)