4 na Korean Nationals naaresto sa magkakahiwalay na operasyon; 3 sa kanila sangkot sa illegal online gambling

Apat na Korean nationals na sangkot sa large-scale illegal gambling at fraud ang naaresto ng Bureau of Immigration (BI) sa magkakahiwalay na operasyon.

Unang nadakip ng Fugitive Search Unit (FSU) ng BI ang dayuhang si Oh Kyoungchul, 42-anyos sa Clark Freeport Zone, Pampanga na nagsilbing lider ng illegal gambling video production ring sa Cebu mula 2016 hanggang 2018.

Sa hiwalay na operasyon sa Ninoy Aquino International Airport (NAIA) Terminal 3 dinakip ang dayuhang si Jung Hoesung, 40-anyos na wanted sa Korea dahil sa ilegal na operasyon ng 23 illegal online gambling platforms.

Nadakip naman sa San Juan City si Han Jonghoon, 41-anyos na finance team leader ng criminal organization na nag-ooperate din ng 23 gambling websites.

Ang tatlong nabanggit na mga dayuhan ay ikukunsider nang undesirable aliens at dinala sa Bureau of Immigration Warden Facility para sa deportation proceedings.

Samantala, inaresto din ng BI ang isa pang Korean na si Yang Koo Youn, 39-anyos matapos matuklasan na overstaying na siya sa bansa. (DDC)