Presyo ng palay hindi na bababa ayon kay Pangulong Marcos

Tiniyak ni Pangulong Ferdinand Marcos Jr. sa mga magsasaka na hindi na bababa pa ng sobra ang presyo ng palay.

Ayon sa pangulo, patuloy na bibili ang National Food Authority (NFA) ng palay mula sa mga magsasaka sa presyong P18 per kilo para sa fresh o wet, at P19 hanggang P23 naman per kilo kapag clean and dry.

Sa kaniyang latest vlog, sinabi ni Pangulong Marcos na Kahit pinalalawig ng pamahalaan ang P20 per kilo rice program nito ay hindi bababa ang pagbili ng NFA sa palay ng mga magsasaka.

Nangako din ang pangulo sa mga magsasaka na magdaragdag pa ng rice processing plant sa iba’t ibang bahagi ng bansa para magamit ng mga magsasaka.

Kaya kasi aniya binabarat ng rice traders ang mga magsasaka dahil sa napipilitan silang ibenta na ang hawak nilang palay kahit basa pa dahil wala silang gamit para sa rice processing. (DDC)