2 estudyante sugatan sa pananaksak ng kapwa estudyante sa Antique

Nasugatan ang dalawang estudyante ng Antique National High School makaraang saksakin ng kapwa nila estudyante umaga ng Huwebes, July 3.

Isa sa mga biktima ang nagtamo ng saksak sa likod at ang ikalawang biktima naman ay nagtamo ng minor na sugat sa tiyan.

Kapwa ginagamot ngayon sa ospital ang dalawang mag-aaral.

Ayon sa pamunuan ng paaralan, ang suspek ay isang Grade 9 na estudyante na tinangkang tumakas ngunit nadakip din kalaunan.

Dinala ang suspek sa Women and Children Protection Desk habang patuloy pa ang imbestigasyon sa insidente.

Kinondena naman ng Department of Education – Schools Division of Antique ang nangyaring insidente ng pananaksak sa paaralan.

Ayon sa pahayag, hindi kailan man kinukunsinte ng DepEd ang ganitong mga insidente at hindi rin ito naaayon sa Child Protection Policy ng Kagawaran.

Tiniyak din ng DepEd na mabilis ang naging aksyon ng pamunuan ng paaralan para masiguro ang kaligtasan ng mga biktima at ng lahat ng mag-aaral sa eskwelahan.

Ipinatawag na din ng school administration para sa isang conference ang mga magulang ng mga batang sangkot.

Nagsasagawa na ng internal investigation ang paaralan para matukoy kung ano ang naging dahilan ng pananaksak.

Tiniyak din ng DepEd na bibigyan ng psychosocial support services ang mga sangkot na estudyante maging ang kanilang pamilya, gayundin ang mga mag-aaral na nakasaksi sa insidente. (DDC)