Lisensya ng driver ng jeep na nasangkot sa malagim na aksidente sa Commonwealth Avenue sa QC, binawi na ng LTO

Binawi na ng Land Transportation Office (LTO) ang driver’s license ng jeepney driver na sangkot sa malagim na aksidente sa Commonwealth Avenue sa Quezon City na ikinasawi ng dalawang (2) katao at ikinasugat ng labinganim (16) na iba pa.

Ayon kay LTO Chief, Assistant Secretary Atty. Vigor D. Mendoza II napatunayang guilty sa reckless driving ang driver ng pampasaherong jeep sa isinagawang imbestigasyon ng ahensya.

Batay sa imbestigasyon, may nabanggang sasakyan ang jeep habang mabilis nitong binabaybay ang Commonwealth Avenue dahilan para tumagilid ito.

Pumanaw ang dalawang college students na sakay ng jeep makaraang tumilapon sila palabas ng sasakyan.

Pawang pasahero din ng jeep ang labinganim na nasugatan. (DDC)