82 pang Mercury Drug stores sa bansa tatanggap na din ng guarantee letters mula DSWD

May dagdag na walumpu’t dalawa (82) pang branches ng Mercury Drug sa pitong rehiyon sa bansa ang tatanggap na din ng guarantee letters (GLs) na ini-isyu ng Department of Social Welfare and Development (DSWD) sa ilalim ng kanilang Assistance to Individuals in Crisis Situation (AICS) at Ayuda sa Kapos ang Kita Program (AKAP).

Ayon kay DSWD Asst. Secretary Irene Dumlao, sa ngayon ay mayroon ng 174 na Mercury Drug branches ang tumanggap ng GLs ng DSWD sa buong bansa.

Dahil dito, mas marami nang benepisyaryo ng ahensya ang makakabili ng gamot o kanilang maintenance medicines mula sa DSWD partner-drugstores.

Gamit ang GL, ginagarantya ng DSWD na babayaran ng ahensya ang gamot na mabibili ng kanilang benepisyaryo sa ilalim ng AKAP at AICS program. (DDC)