U.S. Trade and Development Agency tutulong na mapondohan ang Subic-Clark-Manila-Batangas Railway

Tutulong ang U.S. Trade and Development Agency (USTDA) para mapondohan ang konstruksyon ng Subic-Clark-Manila-Batangas (SCMB) Railway.

Layunin ng nasabing proyekto na pagdugtungin ang tatlong pangunahing daungan sa Luzon — ang Subic, Clark, at Batangas Ports.

Inaasahang mapapaluwag nito ang Port of Manila at mapabilis naman ang daloy ng kalakal.

Ayon kay DOTr Secretary Vince Dizon, ang planong freight cargo railway ay bahagi ng inisyatibong i-decentralize ang operasyon ng Manila Port at palakasin ang transport capacity sa Batangas Port at Subic Bay kasunod na din ng direktiba ni Pangulong Ferdinand Marcos Jr. na tiyakin na tuluy-tuloy ang pagbiyahe sa mga produkto.

Nilagdaan ni Dizon at mga opisyal ng USTA ang Beneficiary Agreement sa isang seremonya sa Arlington, Virginia.

Bahagi ng ipagkakaloob na technical assistance ng USTDA para sa SCMB Railway ang transport model development, port-rail integration study, at legal and institutional framework analysis. (DDC)