Ready-to-eat foods nakatakdang i-deploy ng DSWD sa mga pantalan

Handa nang i-deploy sa mga pantalan sa bansa ang ready-to-eat foods bilang paghahanda ng Department of Social Welfare and Development sa mga inaasahang kalamidad ngayong panahon ng tag-ulan.

Ang mga ito ay naglalaman ng pre-cooked meals at magiging bahagi na ng relief items ng DSWD na ipapamahagi sa mga stranded sa mga pantalan.

Ayon kay DSWD SAS Leo Quintilla, nakatakdang lumagda sa Relief Prepositioning Agreement ang DSWD at Philippine Ports Authority (PPA) para sa paglalagay ng ready-to-eat food (RTEF) packs sa piling pantalan ng PPA.

Kabilang sa target na mabigyan ng RTEF ang North Harbor Pier sa Maynila at mga pantalan sa Bicol Region, Eastern Visayas at Batangas.

Sa nasabing mga pantalan kasi madalas na nagkakaroon ng stranded na pasahero kapag may bagyo.

Sa ngayon sinabi ng DSWD na mayroong inisyal na 120,000 RTEF ang nakatakdang i-deploy rin ng ahensya sa iba’t ibang field offices sa bansa.

Ayon sa ahensya ng mga pagkaing laman RTEF ay masustansya, masarap at halal-certified. (DDC)