LRT-2 nakaranas ng technical problem; umagang biyahe ng mga tren mula Recto hanggang Cubao lamang at pabalik

Nagpatupad ng provisionary service ang LRT Line 2 dahil sa naranasang technical problem.

Unang nag-abiso ang pamunuan ng LRT-2 na maaantala ang pagbubukas ng kanilang operasyon pero kalaunan, inanunsyo na ang tanging biyahe ng kanilang ga tren ay mula Recto station hanggang Araneta Center-Cubao station lamang at pabalik.

Dahil dito, maraming pasahero ang naperwisyo particular sa mga istasyon ng LRT-2 na walang biyahe ng tren.

Sa Marcos Highway, tambak ang mga pasaherong nag-aabang ng masasakyan sa ibaba ng Antipolo Station.

Pasado alas 9:00 ng umaga nang ianunsyo na ipinag-utos ng Department of Transportation (DOTr) ang pagbibigay ng Libreng Sakay sa mga apektadong pasahero.

Nagpadala ng mga shuttle service ang LRTA sa mga istasyon ng Antipolo, Marikina-Pasig, Santolan, Katipunan at Anonas para isakay ng libre ang mga apektadong pasahero patungong Araneta Center-Cubao station.

Bago mag-alas 11:00 ng umaga nang ianunsyo ng LRTA na balik na sa normal ang biyahe at may mga tren na mula Recto hanggang Antipolo at pabalik. (DDC)