Higit 1,500 Las Piñeros tumanggap ng libreng health services mula sa Lab for All Caravan
Malugod na tinanggap ng Las Piñas City sa pangunguna nina Mayor Imelda Aguilar at Vice Mayor April Aguilar ang “Lab For All: Laboratoryo, Konsulta, at Gamot para sa Lahat” caravan ng gobyerno na isinagawa sa Aguilar Sports Complex, Barangay Pilar.
Ang medical at social outreach ay nagbigay ng libreng mga serbisyong pangkalusugan sa mahigit 1,500 na residente sa koordinasyon ng Department of Health (DOH), partner agencies, at ng pribadong sektor.
Taos-pusong nagpasalamat si Mayor Mel Aguilar sa Office of the First Lady at DOH sa pagdadala ng Lab For All program sa lungsod kung saan binanggit nito ang matibay na pakikiisa ng Las Piñas sa tuluy-tuloy na pagsusulong nang paghahatid ng mga serbisyong pangkalusugan na mas malapit sa komunidad.
Ipinahayag naman ni Vice Mayor April Aguilar ang mensahe para sa pagkakaisa at pagmamalasakit kasabay ng pagpapaabot nito ng pasasalamat sa lahat ng volunteers at partner organizations na nagtulung-tulong upang serbisyuhan ang mga Las Piñero sa buong araw.
Pinangunahan naman ni First Lady Louise Araneta-Marcos ang pambansang delegasyon at binigyang-diin nito ang suporta ng administrasyon para sa maternal at child care partikular na ang First 1,000 Days Program.
Dumalo sa kaganapan sina DOH Secretary Teodoro Herbosa at Department of the Interior and Local Government Secretary Jonvic Remulla na kapwa nagpahayag ng kanilang pagsuporta sa adhikain ng caravan na makapagbigay ng accessible at programang pangkalusugan na nakasentro sa mamamayan.
Kabilang sa mga handog na serbisyo ay ang free medical consultations, blood sugar and cholesterol tests, reproductive health services, eye checkups, free eyeglasses, family planning assistance, at mga gamot o medicinal.
Bukod dito, nakatanggap din ang mga residente ng legal consultations mula sa Public Attorney’s Office, assistance galing ng Pag-IBIG at National Housing Authority, at suporta naman buhat sa Senate’s outreach team.
Sa pamamagitan ng patuloy na partnership sa pagitan ng lokal na pamahalaan at ng mga ahensiya ng gobyerno, ang Lab For All caravan ay nagsisilbing malinaw na halimbawa ng tulong-tulong na mga hakbang para direktang hatiran ng mahahalagang serbisyo ang mamamayan.
Naninindigan ang Las Piñas sa kanyang pangakong itaguyod ang kalusugan at kapakanan ng bawat Las Piñero. (Bhelle Gamboa)
