Halos P1M na halaga ng ilegal na droga nakumpiska sa Rodriguez, Rizal; 2 suspek arestado

Arestado ang dalawang katao sa ikinasang buy-bust operation ng Municipal Drug Enforcement Team ng Rodriguez Municipal Police Station sa Brgy. San Isidro, Rodriguez, Rizal.

Kinilala ang mga suspek na sina alyas “Otto”, 35 taong gulang, at alyas “Totoy”, 33 taong gulang.

Isinagawa ang operasyon matapos ang masusing surveillance ng mga operatiba na nagresulta sa pagkakaaresto ng dalawang suspek.

Nakumpiska sa kanila ang 8 pakete na naglalaman ng hinihinalang shabu na may bigat na humigit-kumulang 142 gramo at tinatayang aabot sa P965,600 ang halaga.

Nakuha din mula kay alyas Otto ang isang Magnum .22 “Black Widow” pistol at 4 na piraso ng bala.

Ang mga naarestong suspek ay kasalukuyang nasa kustodiya ng Rodriguez Custodial Facility at mahaharap sa mga reklamong paglabag sa R.A 9165 o Comprehensive Dangerous Drugs Act of 2002 at R.A 10591 o Comprehensive Firearms and Ammunition Regulation Act. (DDC)