3 HVIs arestado sa Makati City; higit ₱850K na halaga ng ‘shabu’ nakumpiska
Sa matagumpay na anti-illegal drugs operation, naaresto ng mga tauhan ng Makati City Police Station ang tatlong High-Value Individuals (HVIs) at nakumpiska ang ₱856,800.00 na halaga ng pinaghihinalaang shabu sa Solchuaga Street, Barangay Tejeros sa lungsod.
Naaresto sa paglabag sa kasong Comprehensive Dangerous Drugs Act of 2002 ang mga suspek na sina alyas “Keano,” 32-anyos, residente sa San Andres Bukid, Manila; alyas “Dodong,” 40-anyos; at alyas “Palito,” 42-anyos, kapwa nakatira sa Brgy. Tejeros, Makati City.
Ayon sa report, nagsagawa ng buy-bust operation ang mga operatiba ng Station Drug Enforcement Unit (SDEU) sa koordinasyon ng Sub-Station 1 (Olympia) sa ilalim ng direktiba ni Col. Reycon L. Garduque, Officer-in-Charge ng Makati CPS kung saan nakabili umano ng isang pakete ng droga ang police poseur buyer mula sa suspek na si alyas Keano na nagresulta ng pagkakaaresto nito kasama ang dalawang iba pa at narekober ang 126 na gramo ng ‘shabu’, buy-bust moneh, at cell phone na pinaniniwalaang ginamit sa illegal drug transactions.
Pinuri ni Acting Southern Police District Director BGen Joseph R. Arguelles ang Makati CPS sa kanilang propesyunalismo at tamang taktika sa pagsasagawa ng operasyon.
Naninindigan ang SPD sa pagsuporta nito sa pambansang kampanya kontra ilegal na droga.
“This accomplishment highlights not only the tactical proficiency of SPD units but also the power of coordinated, intelligence-led policing. Through relentless law enforcement operations, strong community partnerships, and modernized crime-fighting approaches, the SPD continues to work toward building safer, drug-free communities for all.” (Bhelle Gamboa)
