𝗙𝗔𝗞𝗘 𝗡𝗘𝗪𝗦 𝗔𝗟𝗘𝗥𝗧: Comelec itinanggi ang kumakalat na pahayag hinggil sa pagbura sa lahat ng files na ginamit noong 2025 elections

Itinanggi ng Commission on Elections (Comelec) ang kumakalat na pahayag na binura ng poll body ang lahat ng files na may kinalaman sa 2025 National and Local Elections, pati na ang akusasyon na isinagawa ito upang hindi na ma-retrieve ang files at para magbura ng ebidensya.

Sa paliwanag ng Comelec, nagsagawa ito ng Data Deletion ng soft copies ng Ballot Faces, Accountable Forms, at Voter Information Sheets (VIS) kaugnay ng 2025 NLE mula sa National Printing Office (NPO) Data Servers noong June 17, 2025 bilang pagtalima sa Data Privacy Act of 2012 o RA 10173.

Ayon kay Commissioner Rey E. Bulay, Commissioner-in-Charge ng Ballot Printing Committee, ang pagbura ng files na isinagawa sa tanggapan ng NPO sa Quezon City ay sang-ayon sa Comelec en banc Resolution na inaprubahan noong May 27, 2025.

Ang aktibidad na ito ay bahagi ng regular na aktibidad ng Comelec na isinasagawa pagkatapos ng bawat halalan, at huling hakbang na magsisilbing pagtatapos ng operations ng Ballot Printing Committee.

Ito ay mahalagang parte ng data protection at transparency measures ng Comelec, at isinagawa nang may pabatid sa election stakeholders at media, at naaayon sa mga umiiral na batas.

Ayon sa poll body, walang dapat na ikabahala ang publiko sapagkat mayroong archive ng 2025 NLE files.

Ang pagbubura ng files sa NPO Data Servers ay sinisiguro na walang maiiwan na files sa kanilang database, at hindi ito magagamit sa hindi otorisadong bagay kapag wala nang empleyado ng Comelec na naka-duty sa pasilidad ng NPO sa pagwawakas ng election period. (DDC)