Santa Cruz, Laguna binulabog ng bomb threat; klase sa mga paaralan at pasok sa tanggapan ng gobyerno, sinuspinde

Sinuspinde ang klase sa lahat ng antas sa mga pampublikong aaralan at pribadong paaralan sa bayan ng Santa Cruz sa lalawigan ng Laguna araw ng Miyerkules, June 18.

Ito ay makaraang makatanggap ng bomb threat ang Santa Cruz Elementary School at ba pang opisina ng gobyerno sa pamamagitan ng mensahe sa social media.

Ayon kay Santa Cruz Mayor Egay San Luis, agad bineripika ng impormasyon at siniguro ang kaligtasan ng mga mag-aaral at ng publiko.

Kasama ring sinuspinde ang pasok sa mga government office.

Matapos ang ginawang inspeksyon ng mga tauhan ng Explosive and Ordnance Division (EOD) at K9 Team, napatunayang ligtas at walang banta ng bomba sa paaralan at maging ang mga tanggapan ng local na pamahalaan.

Paalala ng alkalde sa mga residente, maging kalmado, alerto, at mapanuri sa ganitong sitwasyon.

Huwag din basta-basta magpapaniwala o magpapakalat ng impormasyong hindi mula sa mga opisyal na sources. (DDC)