DOH-Eastern Visayas umapela sa publiko na huwag magpakalat ng mga pekeng impormasyon tungkol sa MPOX

Umapela ang Department of Health (DOH) Eastern Visayas sa publiko na iwasan ang pagpapakalat ng pekeng balita at impormasyon tungkol sa sakit na MPOX o monkeypox.

Ayon sa DOH-Eastern Visayas, ang mga mali at pekeng impormasyon ay maaaring magdulot ng takot, pagkalito at panic sa komunidad.

Ginawa ng ahensya ang apela kasunod ng pagkumpirma ng naitalang kaso ng MPOX sa Sogod, Southern Leyte.

Ayon sa DOH, ang MPOX ay impeksyong dulot ng monkeypox virus.

Kabilang sa mga sintomas nito ang lagnat, pantal, lymph nodes, sore throat, pananakit ng kalamnan at likod, matinding pagod at sakit ng ulo.

Maaaring mahawa sa sakit sa pamamagitan ng direktang pakikisalamuha sa taong mayroon nito kabilang ang skin to skin contact gaya ng pag-uusap, paghinga, paghalik, pagyakap, paghawak at pakikipagtalik.

Maaari ding mahawak kung hinawakan ang kontaminadong mga bagay gaya ng kumot, twalya, damit at iba pa.

Paalala ng DOH Eastern Visayas sa publiko ibahagi lamang ang mga beripikadong impormasyon na makikita sa kanilang official social media channels. (DDC)