P29.7M na halaga ng shabu nakumpiska sa isang pasahero galing Malaysia

Nakumpiska ng mga tauhan ng Bureau of Customs (BOC)-Ninoy Aquino International Airport (NAIA) ang mahigit P29.7 million na halaga ng shabu mula sa isang pasahero na dumating sa NAIA Terminal 3 galing Malaysia.

Hinarang ng mga otoridad mula sa BOC katuwang ang Philippine Drug Enforcement Agency (PDEA) at NAIA Inter-Agency Drug Interdiction Task Group (NAIA-IADITG) ang bagahe ng isang pasahero matapos makita ang kahina-hinalang laman nito nang isailalim sa X-Ray.

Nakita sa bagahe ng pasahero ang 4,368 na gramo ng shabu na may kabuuang halaga na P29,702,400.

Agad na inaresto ang pasahero na nasa kostodiya na ngayon ng PDEA para maisailalim sa inquest proceedings sa reklamong paglabag sa Republic Act No. 9165 o Comprehensive Dangerous Drugs Act of 2002 at Republic Act No. 10863 o Customs Modernization and Tariff Act. (DDC)