Muntinlupa LGU namahagi ng libreng school supplies sa 100,000 na mag-aaral

Sinimulan na ng Pamahalaang Lungsod ng Muntinlupa ang pamamahagi ng taunang Libreng Balik Eskwela Package para sa halos 100,000 na estudyante sa mga pampublikong paaralan magmula sa daycare hanggang senior high school.

Pinangunahan mismo ni Mayor Ruffy Biazon ang unang araw ng distribusyon sa ilang pampublikong paaralan, kung saan personal niyang iniabot ang mga school supplies at sapatos sa mga estudyante. Layunin ng programa na maibsan ang gastusin ng mga pamilya at matulungan ang mga estudyante sa paghahanda para sa bagong school year.

Ang bawat Balik Eskwela package ay naglalaman ng backpack, notebooks, pad papers, ballpen, lapis, pencil case, at itim na leather shoes. Noong nakaraang taon, MUNwalk sneakers naman ang ibinigay.

“Ginagawa natin ang lahat para masuportahan ang kinabukasan ng kabataang Muntinlupeño. Kaya yearly din ang distribution natin ng Balik Eskwela packages bilang tulong sa mga gastusin ng mga pamilya at paghahanda ng mga estudyante sa panibagong school year,” ani Mayor Biazon sa isang Facebook post.

“Ang hiling lang natin sa ating mga kabataan—mag-aral nang mabuti,” dagdag ng alkalde.

Bahagi ito ng patuloy na pagtutok ng lungsod sa edukasyon sa ilalim ng 7K Agenda ni Mayor Biazon, na layong palakasin ang access sa dekalidad na edukasyon. (Bhelle Gamboa)