Hirit na i-adopt na lang ng Kamara ang P100 wage hike bill ng Senado, tinanggihan ni Rizal 4th Dist. Rep. Nograles

Tinanggihan ni Rizal 4th Dist. Rep. Juan Fidel Felipe Nograles ang kahilingan ng senado na i-adopt na lamang ang bersyon nito sa minimum wage hike bill.

Sa kaniyang liham kay Nograles, hiniling ni Sen. Joel Villanueva na i-adopt na lang ng Kamara ang bersyo ng Senado kung saan P100 ang ipinapanukalang wage increase.

Sa bersyon ng Kamara, nakasaad na P200 dapat ang ibigay na wage hike sa mga manggagawa.

Ayon kay Villanueva, kung papayag ang Kamara ay hindi na kailangang magkaroon ng bicameral conference committee.

Gayunman, bilang chairperson ng House Committee on Labor and Employment, tinanggihan ito ni Nograles.

Sa halip ay umapela si Nograles para sa agarang pag-convene ng bicameral conference committee para makaabot sa deadline.

Ani Nograles, hindi sapat ang P100 na dagdag sahod para sa mga manggagawa at handa ang Kamara idaan sa deliberasyon ang kanilang bersyon na P200 wage hike. (DDC)