DA hihilinging maibalik ang kapangyarihan ng NFA na makapagbenta ng stock ng bigas; mas mataas na budget ihihirit din sa Kamara

Hihilingin ng Department of Agriculture (DA) sa pagbubukas ng Kongreso sa Hulyo na ibalik ang inalis na kapangyarihan ng National Food Authority (NFA) upang muling matulungan ang mga magsasaka na madagdagan ang kanilang kita.

Sa pakikipagdayalogo ni Agriculture Secretary Francisco “Kiko” Tiu Laurel Jr. sa mga magsasaka sa Mindoro kamakailan, sinabi nitong kapag pinayagang ibenta ang mga hindi nalulumang imbentaryo sa bigas ay magkakaroon ng malaking financial flexibility at mapapaluwag ang mga bodega – na magiging daan upang makabili ng mas maraming palay sa mga magsasaka sa mas magandang presyo.

Ang mas malakas na NFA aniya, ay naaayon sa pangarap ni Pangulong Ferdinand Marcos Jr. para sa katatagan ng pagkain sa Pilipinas.

Hinihingi ng NFA na madoble ang budget sa pagblili ng palay na P18 billion para sa 2026 upang makabili ng hanggang 10 percent ng ani ng bansa at maitatag ang reserba para sa pagtugon sa kalamidad at katatagan sa presyo.

Kung mapapalakas ang kapangyarihan ng NFA at magkakaroon ng mas mataas na budget ay makakabili ito ng hanggang 30 porsiyento ng ani sa buong bansa na sapat na para impluwensiyahan ang farm gate prices at mapatatag ang merkado. (DDC)