Apat na katao na nahulihan ng P3.5M na halaga ng illegal agri-chemical trade sasampahan na ng kaso sa korte

Inirekomenda ng Las Piñas City Prosecutors Office ang pagsasampa ng kaso laban sa apat na indibidwal na lumabag sa Fertilizer and Pesticides Act dahil sa illegal na pagbebenta ng hindi rehistradong agricultural chemicals ng walang lisensiya.

Sa pahayag sinabi ni Agriculture Secretary Francisco “Kiko” Tiu Laurel Jr. ang naturang ilegal na aktibidad ng mga indibidwal na hindi lamang nakapinsala sa mga magsasaka at nakaapekto sa produksiyon sa agrikultura kundi nagpaghina rin sa adhikain ng pamahalaan na matiyak ang food security sa bansa.

Iniutos ng Las Piñas prosecutor ang pagsasampa ng kaso laban kina James Malinao Halasan, Julievie Galleon Dumalagan, Prescillano Baloma, at Raina Mosong Canalita na naaresto sa entrapment operations ng pulisya.

Nagpanggap ang mga suspek na kinatawan ng WLEX Co. Philippines Inc., na nagresulta sa pagkadiskubre sa mga hindi rehistradong fertilizers at pesticides na nagkakahalaga ng tinatayang P3.5 million sa isang warehouse sa Las Piñas City.

Bilang dagdag sa paglaban sa illegal na pagbebenta ng fertilizers at pasticides, hinahabol din ng DA ang mga sangkot sa smuggling ng mga produktong agrikultura at nakapagsampa na ng mga kaso sa nakalipas na mga buwan.

Binigyang-diin ni Fertilizer and Pesticide Authority (FPA) Executive Director Glenn Estrada na ang pag-aresto at pag-uusig ay bahagi ng pinalakas na kampanya laban sa talamak na pagbebenta ng mga kemikal pang-agrikultura. (DDC)