200 pang PDLs ng Bilibid inilipat sa Occidental Mindoro
Nasa Sablayan Prison and Penal Farm sa Occidental Mindoro na ang 200 pang persons deprived of liberty (PDLs) mula sa New Bilibid Prison (NBP) sa Muntinlupa City matapos ang matagumpay na operasyon ng paglilipat na isinagawa ng Bureau of Corrections (BuCor).
Sinabi ni BuCor Director General Gregorio Pio P. Catapang Jr. na iniskortan ang mga PDLs ng 100 na corrections officers sa pamumuno ni CCInsp Anthony Nupable Omega sa tulong ng BuCor SWAT, PNP Muntinlupa, PNP HPG, Coast Guard, Port Police at SLEX Security Team upang tiyakin ang kaligtasan at seguridad ng paglipat ng PDLs.
Inihayag pa ni Catapang na ang transfer ay bahagi sa patuloy na decongestion program ng NBP at paghahanda sa pagsasara nito sa 2028 at suporta sa mga taong kailangan sa agrikultura ng Sablayan for Institutional Projects.
Ikinatuwa naman ng BuCor chief na ligtas na nakarating sa SPPF ang mga nabanggit na PDLs.
Samantala bilang paghahanda ngayong panahon ng tag-ulan,inatasan ni Catapang ang kanyang mga opisyal na magpatupad ng mga pag-iingat na hakbang sa lahat ng pasilidad na saklaw ng BuCor.
Kabilang sa kanyang tagubilin ang mahahalagang gawain katulad ng pag-iinspeksiyon at pagkukumpuni ng bubong, paglilinis sa mga kanal at drainage systems, pagtatabas ng puno, at pagsisiguro na handa ang emergency power supplies.
Binigyang-diin ni Catapang na sa pagsunod sa mga preventative strategies, nais ng BuCor na mabawasan ang mga panganib na dala ng matinding pag-uulan kung saan parehong maisasaalang-alang ang kaligtasan ng inmates at staff.
Panawagan pa nito sa kanyang team na manatiling mapanuri sa pamamagitan ng pakikinig sa lokal na weather advisories at maagap na tumugon sa anumang mga banta ng pagbabaha.Binanggit din niya ang importansiya ng paghahanda upang maibsan ang potensiyal na panganib, aksidente, o pagkasira ng buhay at ari-arian. (Bhelle Gamboa)
