BASAHIN: Mga dapat malaman sa dry-run ng odd-even scheme sa EDSA na sisimulan sa June 16

Magsasagawa ang Metropolitan Manila Development Authority (MMDA) ng isang buwan na dry-run para sa ipatutupad na Odd-Even Scheme sa EDSA simula sa June 16, 2025.

Ayon sa MMDA, sa loob ng isang buwang dry-run ay walang huhulihing motorista.

Ang mga lalabag ay sisitahin lamang at padadalhan ng notice pero hindi pa papatawan ng multa.

Bahagi ito ng information drive para bigyang oras ang mga motorista na malaman at masanay sa bagong polisiya para sa EDSA Rebuild project.

Ayon naman sa MMDA Traffic Engineering Center, ang mga sumusunod na vehicle categories ay exempted sa Odd-Even Scheme:

➢ Electric Vehicles (EVs), Plug-in Hybrids, and Hybrids na recognized ng Department of Energy sa ilalim ng Electric Vehicle Industry Development Act (EVIDA)
➢ Non-motorized vehicles
➢ Emergency vehicles, tulad ng ambulances, fire trucks, at police mobile units
➢ Public Utility Vehicles, tulad ng city buses, jeepneys, at taxis
➢ Transport Network Vehicles (TNVs) na nag-o-operate sa ilalim ng accredited ride-hailing platforms
➢ Authorized marked government vehicles na may official plates at ginagamit para sa essential services
➢ Motorcycles

Ang mga sasakyan na tatawid lamang ng EDSA sa pamamagitan ng intersection ay exempted din sa Odd-Even Scheme. (DDC)