DOLE naglabas ng pay rules para sa magkasunod na holiday sa buwan ng Hunyo

Nagpalabas ng pay rules ang Department of Labor and Employment (DOLE) para sa tamang pagpapasahod sa mga empleyadong papasok sa trabaho sa June 6 at June 12 na parehong deklaraong Regular Hholiday sa buong bansa.

Ayon sa Labor Advisory No. 8 ng DOLE, idineklara ng Malakanyang na Regular Holiday ang June 6 bilang pagdiriwang ng Eidul Adha at ang June 12 bilang paggunita sa Independence Day.

Ang mga empleyado na hindi magtatrabaho sa dalawang holiday ay makatatanggap pa din ng 100 percent ng kanilang basic wage para sa nasabing mga araw.

Kung papasok naman sa trabaho, tatanggap ang empleyado ng 200 percent ng kanilang basic wage para sa unang walong oras sa duty.

Kung kailangang mag-overtime, makatatanggap pa ang empleyado ng dagdag na 30 percent sa kaniyang hourly rate.

Paalala ng DOLE sa mga employer, tiyaking maibibigay ang tamang pasahod sa kanilang mga manggagawa. (DDC)