Palay ng mga katutubo, bibilhin ng NFA

Lumagda ang Department of Agriculture – Philippines (DA) at ang National Food Authority (NFA) sa isang Memorandum of Understanding (MOU) para sa programang Kabuhayan at Kaunlaran ng Kababayang Katutubo (4K) Project.

Layunin ng kasunduan na mailapit ang tulong ng DA at ng NFA sa mga katutubong pamayanan na naninirahan sa mga liblib na lugar.

Sa ilalim ng MOU matutulungan ang mga katutubo na magkaroon ng patas na oportunidad sa merkado sa pamamagitan ng pagbebenta ng kanilang palay sa NFA.

Ang kasunduang nilagdaan ay ayon sa utos ni Pangulong Ferdinand “Bongbong” Marcos, Jr. na magbigay ng suporta mula sa pamahalaan, matiyak ang patas na presyo, mabawasan ang gastusin sa transportasyon, at mapalakas kabuhayan ng mga katutubong komunidad.

Sa ginanap na pulong, kinilala ni NFA Administrator Larry R. Lacson ang mahalagang ambag ng ating mga katutubo sa pambansang agrikultura. (DDC)