BuCor target ang eco-tourism sites sa OPPFs sa bansa

Inatasan ni Bureau of Corrections (BuCor) Director General Gregorio Pio P. Catapang Jr. ang mga superintendents mula sa mga operating prison and penal farms (OPPFs) sa bansa na pag-aralan ang kanilang nasasakupang lugar para gawing eco-tourism sites.

Ang ganitong hakbang ay pagpapayabong sa natural o likas na kagandahan ng kapaligiran na matatagpuan sa mga pasilidad upang magserbisyo ng higit pa sa correctional institutions.

Ipinunto ni Catapang na karamihan sa kanilang OPPFs ay pawang pinapalibutan ng magagandang tanawin at matingkad na kapaligiran na maiaalok sa mga bisita para sa kakaiba at nakakaengganyong karanasan.

Sa pamamagitan ng pagsasaayos sa potensiyal na eco-tourism sites sa OPPFs, sa pananaw ng Bucor chief ay hindi lamang ito makatutulong sa rehabilitasyon ng mga inmates kundi pagagandahin din nito ang koneksiyon sa kalikasan at isulong ang paglago ng ekonomiya.

Idinagdag pa nito na ang pagdagsa ng mga bisita ay malaking benepisyo sa lokal na ekonomiya dahil tatangkilikin ng mga turistang lokal o banyaga ang malalapit na restaurants, shops, at accommodations,na magpapaganda sa sigla ng komunidad.

Ayon pa kay Catapang ang pinansiyal na benepisyo sa ganitong modelong eco-tourism ay agarang magpapalawak nang makukuha sa ekonomiya at binigyang-diin nito ang kahalagahan ng muling pagpupuhunan ng kita sa lokal na komunidad at lalo pang maisaayos ang mga prison facilities at programa.

Ito ay lumilikha ng malapit at pangmatagalang relasyon sa pagitan ng turismo at kaunlaran ng komunidad na nagpapakita kung gaano ang ganitong mga inisyatiba ay mag-aangat sa parehong inmates at nakapaligid na karatig lugar.

Ang ninanais ni Catapang ay nagsusulong sa kagalingan, edukasyon, at matatag na kinabukasan na malinaw na makikita ang potensiyal na pagkilala sa ginagampanang tungkulin ng prisons bilang lugar para sa rehabilitasyon at pagpapayaman ng komunidad.

Narito ang pitong OPPFs sa ilalim ng superbisyon ng BuCor:

* National Bilibid Prison (NBP) sa Muntinlupa City
* Correctional Institution for Women (CIW) sa Mandaluyong City
* Iwahig Prison and Penal Farm (IPPF) sa Palawan
* Davao Prison and Penal Farm (DPPF) sa Davao
* San Ramon Prison and Penal Farm sa Zamboanga City
* Sablayan Prison and Penal Farm sa Occidental Mindoro, at
* Leyte Regional Prison sa Leyte (Bhelle Gamboa)