12 OFWs nakakulong sa Malaysia matapos mahatulan dahil sa pagpasok sa bansa gamit ang pekeng doumento

Kinumpirma ng Department of Migrant Workers (DMW) na mayroong 12 Overseas Filipino Workers (OFWs) ang nakakulong ngayon sa Malaysia.

Ang mga OFWs na kinabibilangan ng 4 na lalaki at 8 babae ay pumasok sa Malaysia gamit ang pekeng entry permits/stamps patungong Laos noong Pebrero 5, 2025.

Inalok sila ng trabaho bilang call center agents na may sahod na ₱50,000 kada buwan ng mga illegal recruiter sa Telegram na sina alyas “HR Ara” at alyas “Joey.”

Mula Manila bumiyahe sila patungong Puerto Princesa, tumuloy sa Dipolog City, Zamboanga City, Basilan, at Siasi, bago tumawid patungong Sabah at saka nakarating sa Kota Kinabalu sa Malaysia gamit ang pekeng dokumento.

Naaresto sila sa border ng Malaysia at Thailand at nahatulan ng korte noong Marso 20, 2025.

Sa tulong ng Philippine Embassy at DMW-Migrant Workers Office sa Kuala Lumpur, napababa ang sentensiya sa 12 Pinoy sa tatlong buwan lamang.

Ang mga lalaking OFW ay nakakulong sa Perlis at ang mga babae ay sa Kedah, at inaasahang makakalaya sa Hunyo 2025.

Muling nanawagan ang Department of Migrant Workers na mag-ingat sa mga alok ng trabaho online. (DDC)