Publiko pinag-iingat sa mga nag-aalok ng siguradong admission slots sa PUP

Pinag-iingat ng Polytechnic University of the Philippines (PUP) ang publiko sa mga indibidwal na nag-aalok ng serbisyo para makasiguro ng admission slots sa unibersidad kapalit ng pera.

Ayon sa pahayag ng PUP, ang nasabing mga gawain ay hindi otorisado at labag sa polisiya ng unibersidad.

Sa ngayon ay inaalam na ng pamunuan ng PUP ang mga ulat hinggil sa nasabing insidente.

Tiniyak din ng PUP na gagawa ng legal na hakbang sakaling may mapatunayang sangkot sa gawain.

Ayon sa PUP, sinisiguro ng pamunuan ng unibersidad ang patas at transparent na admission process sa lahat ng mga aplikante.

Hinimok din ng PUP ang publiko na iulat ang mga kahalintulad na illegal na aktibidad sa University Legal Counsel Office sa kanilang email address na legal@pup.edu.ph. (DDC)