Mga botanteng PDL sa Bilibid nagsimula na ding bumoto

Nagdaos din ng eleksyon sa loob ng New Bilibid Prisons (NBP) sa Muntinlupa City.

Personal na sinaksihan ni Comelec Chairman George Erwin Garcia ang pagboto ng mga Persons Deprived of Liberty (PDLs) sa Bilibid.

Ayon kay Garcia, sa loob lamang ng Bilibid ay mayroong 1,423 na PDLs na botante.

Sa iba pang bilangguan na sakop ng Bureau of Corrections (BuCor), mayroong 3,446 PDLs na botante.

Iba pa aniya ang mga botanteng PDLs sa mga bilangguan naman na sakop ng Bureau of Jail Management and Penology (BJMP).

Ayon kay Garcia, mahalagang makaboto ang mga PDLs, dahil kahit sila ay nakakulong, hindi pa rin nawawala ang kanilang karapatan bilang Pilipino hangga’t hindi sila nahahatulan ng pinal o hangga’t nakaapela pa ang kanilang kaso o dinidinig pa sa korte.

Samantala ayon kay BuCor Director Gregorio Pio Catapang Jr. 2,135 na PDLs ang kuwalipikadong bumoto kasama na rito ang 473 inactive; 924 sa Davao Prison and Penal Farm; 421 sa Leyte Regional Prison; 290 sa San Ramon Prison and Penal Farm sa Zamboanga del Sur; 140 sa Iwahig Prison and Penal Farm sa Puerto Princesa, Palawan; 123 sa Correctional Institution for Women (CIW) sa Mandaluyong City; at 92 naman galing ng CIW-Mindanao.

Dumating din ang mga foreign observers sa special polling precinct sa NBP kung saan inasistehan sila ng BuCor personnel at Muntinlupa City Election Officers.

Unang iniutos ni Catapang sa lahat ng superintendents ng Operating Prison and Penal Farms na siguruhin ang kaayusan at kapayapaan ng pagsasagawa ng halalan sa kani-kanilang hurisdiksiyon.

Ikinatuwa naman ni Catapang na patuloy na napapahalagahan ang mga karapatan ng mga PDLs lalong lalo na ang kanilang karapatang bumiti sa kabila na sila ay nakakulong. (DDC, Bhelle Gamboa)