Suporta bumuhos sa idinaos na Miting De Avance ng Tatak Nene Aguilar Team
Bumuhos ang suporta ng libu-libong Las Piñeros sa miting de avance ng Tatak Nene Aguilar Team sa loob at labas ng Aguilar Sports Complex sa Barangay Pilar, Las Piñas City nitong Biyernes, Mayo 9, 2025.
Apat na araw bago ang halalan sa Mayo 12, patuloy ang matibay na tiwala at suporta ng mamamayan ng Las Pin̈as para sa buong Team Aguilar o Green Team sa pangunguna nina Mayor April Aguilar, Vice Mayor Imelda “Mel” Aguilar, at Congressman Mark Anthony Santos kasama ang District 1 Councilors na sina Alelee Aguilar, Atty. Zardi Abellera, Brian Bayog, Robert Cristobal , Marlon Rosales at Mac Mac Santos.
Habang sa District 2 naman sina Councilors Engr. Henry Medina, Lester Aranda, Luigi Casimiro, Tito Martinez, Macky Saito, at Euan Toralballa.
Sa ginanap na miting de avance ng mga kandidato ng Green Team, sumentro ang adhikain ng grupo sa patuloy na pagpaprayoridad sa kapakanan ng bawat Las Pin̈ero na nakasandig sa iniwang legasiya ng namayapang Mayor Vergel “Nene” Aguilar.
Kabilang sa mahahalagang programang itinataguyod na ng administrasyong Aguilar ang Kalusugan, Kaalaman, Kaayusan, Kabuhayan, at Kinabukasan na patuloy na tinatamasa ng maraming residente.
Binigyang-diin ni Mayor April Aguilar ang importansiya ng bawat programa sa ilalim ng kanilang pamamahala ng running mate na si Vice-Mayor Imelda “Mel” Aguilar sa buong Las Pin̈as.
“Napaka-importante po ng mga programa sa Las Pin̈as, na magmula sa pagkapanganak hanggang sa pagkamatay ay halos libre lahat.Kapag nanganak may Lying-in Clinic sa CAA, kapag po na-ospital may green card po para sa libreng hospitalisasyon at libreng check-up taon-taon sa Hi- Precision,” pahayag ni Mayor April Aguilar.
Binanggit din ni Mayor April Aguilar ang dekalidad na edukasyon at libreng pag-aaral sa 109 na daycare centers ng lungsod gayundin sa grade school, high school at kolehiyo para sa mga Las Piñero.
Patuloy na tumutulong lalo na sa mga residenteng namatayan na wala talagang kakayanang gumastos sa ilalim naman ng programang libreng libing, cremation, at columbarium.
Lubos namang pinasalamatan ni Mayor April Aguilar ang mga taga-Las Pin̈as na walang sawang nagmamahal at sumusuporta sa kanila ni Vice Mayor Imelda Aguilar.
“Kahit wala na ang aking amang si Mayor Nene patuloy ninyo kaming minamahal ni Mayora Mel, maraming-maraming salamat po.Tandaan po ninyo na ang administrasyon ni April Aguilar ay administrasyon na may serbisyong tapat, serbisyong may malasakit, at serbisyong prayoridad ang kapakanan ng bawat Las Piñero,” pagtatapos nito.
Inihayag naman ni Congressman Mark Anthony Santos sa mga taga-Las Pin̈as ang kanyang mabuti at tapat na hangarin sa kanyang pagtakbo ngayong halalan.
“Sa bawat araw ng aking serbisyo, hindi ko po kailanman nakalimutan kung sino ang tunay kong amo—kayo pong mamamayan ng Las Piñas,” sabi ni Cong. Santos.
“Ang laban kong ito ay hindi laban para sa pansariling interes. Hindi ko kailanman ginamit ang posisyon para sa negosyo o kapangyarihan. Ako po’y lumaban upang magkaroon ng on-site socialized housing para sa informal settlers. Ako po ang nagsulong ng resolusyong maglaan ng ₱85 milyon para bumili ng lupa para sa mga maralitang pamilya,” dagdag pa nito.
Ipinaliwanag ni Cong. Santos ang dahilan ng kanyang pagtakbo para kongresista ng Las Pin̈as kung saan inspirasyon niya ang mga Las Piñero na tunay na may kapangyarihan sa halalang ito.
Hinikayat din nito ang mga residente na bumoto para sa tama at lumaban sa mali na aniya’y laban ng pag-asa ng mga Las Piñero.
Samantala tinalakay naman ng anak ni Mayor Nene na si Alelee Aguilar na tumatakbong konsehal sa District 1 ang pagpaprayoridad nito sa edukasyon, kalusugan, at kapakanan ng bawat pamilyang Las Piñero.
Target nitong pagandahin pa ang programang edukasyon at mga serbisyong pangkalusugan para sa kababaihan at kabataan, gayundin ang kanyang malakas na suporta sa mga inisyatibang makatutulong sa senior citizens.
Bilang nag-iisang babaeng kandidatong konsehal sa Team Aguilar, binigyang-diin nito ang kinakailangan para kasama at tumugon sa paggawa ng patakaran o polisiya na sumasalamin sa tunay na pangangailangan ng bawat pamilya at mga komunidad sa Las Piñas.
Dumalo rin sa kaganapan ang mga celebrity supporters na sina Maricel Soriano, Maja Salvador, Enrique Gil, at Aivee Aguilar, upang ipamalas ang kanilang tiwala ar suporta sa Green Team.
Sa panalo ng Tatak Nene Aguilar Team asahan ng mamamayan ng Las Pinas ang pagbuhos ng mas maraming proyekto at serbisyo. (Bhelle Gamboa)
