Unang kaso ng highly pathogenic na H5N9 naitala sa CamSur

Kinumpirma ng Bureau of Animal Industry (BAI) na naitala ang kauna-unahang kaso ng highly pathogenic na H5N9 sa bansa.

Na-detect ang kaso ng High Pathogenicity Avian Influenza (HPAI) Type A Subtype H5N9 ay sa isang farm sa
Camaligan, Camarines Sur.

Iniulat ng Animal Disease Diagnosis and Reference Laboratory ng BAI na nagpositibo ang resulta ng samples na kinuha mula sa mga alagang bibe nang magsagawa ng routine surveillance ang DA Regional Field Office V.

Bagaman highly pathogenic sa mga ibon ang H5N9, mababa naman ang bantang mailipat ito sa tao.

Agad inendorso ng BAI ang pagsasagawa ng disease control measures kabilang ang agarang quarantine, pagkatay sa mga apektadong bibe, surveillance at koordinasyon sa local authorities at sa Department of Health (DOH) para ma-monitor ang posibleng human exposure.

Ayon sa BAI, naisagawa na noong May 6 ang pagkatay at proper disposal sa mga apektadong bibe.

Nakapagsagawa na din ng surveillance sa nasasakupan ng 1-kilometer quarantine zone para matukoy kung may iba pang farm na naapektuhan. (DDC)