Chinese national arestado sa Pasay City
Inaresto ng otoridad ang isang Chinese national makaraang tangkaing magpadala ng parcel na naglalaman ng umano’y ilegal na droga sa pamamagitan ng 2GO Express sa SM Mall of Asia Complex, Barangay 76, Pasay City.
Kinilala ang suspek na si Chao Meng, 38-anyos, na agad dinakip nang madiskubre ang pinaghihinalang shabu na nakatago sa loob ng pulang envelope o sobre na ipadadalang kargamento sana patungong China.
Tinatayang 54.8 na gramo ng umano’y shabu na nagkakahalaga ng P372,640.00 ang nakumpiska ng mga rumespondeng tauhan ng Substation 10 (MOA).
Kabilang sa ebidensiyang narekober ang isang FedEx reusable plastic pack; red envelope; pulang folder; shipment form; 13 deeds of agreement; cellphone; Identification Card (ID) na nasa ilalim ng pangalan na Chao Meng; at itim na sling bag.
Nasa kustodiya ngayon ng Station Drug Enforcement Unit (SDEU) ang suspek at nakatakdang sumalang sa inquest proceedings sa Pasay City Prosecutor’s Office para sa kasong paglabag sa Comprehensive Dangerous Drugs Act of 2002..
Pinuri namn ni Brigadier General Joseph R. Arguelles, Acting District Director ng Southern Police District, ang mabilis na aksyon ng operating team at binigyang-diin nito ang importansiya ng pagiging mapanuri.
“This arrest sends a clear message, we are serious in protecting our communities from the threats of illegal drugs. I commend our personnel for their prompt response and professionalism. We will continue to strengthen our anti-drug efforts to ensure a safer environment for all,” sabi ni BGen Arguelles. (Bhelle Gamboa)
