BRP Gabriela Silang nakabalik na ng bansa matapos ang 26-day Tri-Country Port Visit Mission sa Thailand, Malaysia at Vietnam

Nakabalik na sa bansa ang BRP Gabriela Silang (OPV-8301) matapos ang 26-day Tri-Country Port Visit Mission nito sa Thailand, Malaysia, at Vietnam.

Ang paglalayag ng BRP Gabriela Silang sa tatlong bansa ay bahagi ng hakbang ng Philippine Coast Guard (PCG) para mas mapalakas pa ang maritime diplomacy sa ilalim ng ASEAN Coast Guard Forum (ACF) at bilateral mechanisms sa partner Coast Guards sa rehiyon.

Sa pamumuno ni Captain Eleizer Ibarrientos ng PCG, binisita ng BRP Gabriela Silang ang Laem Chabang Port, Thailand mula Apr. 1 hanggang 3; Port Klang Cruise Terminal sa Malaysia mula Apr. 8 hanggang 10 at ang Tien Sa Port, Da Nang, Vietnam mula Apr. 14 hanggang 17.

Sa kasagsagan ng misyon, ang delegasyon ng PCG na lulan ng barko ay lumahok sa serye ng people-to-people at operational engagements gaya ng courtesy calls, bilateral meetings, ship and facility tours, tabletop discussions, at joint at-sea exercises.

Sa pagbabalik sa bansa, ang mga opisyal at crew ng BRP Gabriela Silang ay ginawaran ng Outstanding Achievement Award para sa kanilang propesyonalismo at dedikasyon. (DDC)