DILG Secretary Remulla pinuna ang hindi pagsunod ni Infanta Mayor Filipina Grace R. America sa kanyang suspensyon

Pinuna ng Department of the Interior and Local Government (DILG) ang patuloy na panunungkulan ni Mayor Grace America ng Infanta, Quezon sa kabila ng kautusang suspensyon laban sa kanya na inilabas noong Enero 10, 2025 ng Sangguniang Panlalawigan.

Kung pagsusumahin mahaba na ang pananatili ni Mayor America sa munisipyo samantalang suspendido ito.

Sa isang liham mula kay DILG Secretary Juanito Victor Remulla na may petsang Abril 4, 2025, ipinahayag na base sa ulat ng DILG Quezon Provincial Office, patuloy pa rin sa pagganap ng kanyang tungkulin si Mayor America sa kabila ng 90-araw na suspensyon.

Binigyang-diin din sa liham ang naunang pahayag ni DILG Regional Director Ariel Iglesia na ang naturang desisyon ay “agad na maisasakatuparan” kahit ito ay hindi pa pinal.

Ayon sa Seksyon 46 ng Local Government Code, ang bise-alkalde ang awtomatikong hahalili sa mga tungkulin ng punong bayan habang ito ay suspendido.

Pinaalalahanan si Mayor America na sundin ang umiiral na kautusan at hayaan ang Bise-Alkalde na gampanan ang kanyang mga tungkulin bilang pansamantalang pinuno ng bayan.

Wala pang opisyal na pahayag mula sa kampo ni Mayor America ukol sa isyung ito. (JR Narit)