3 drug suspects nadakip, P680K shabu nakumpiska sa Pasay

Nadakip ng mga operatiba ng Southern Police District Drug Enforcement Office (DDEU-SPD) sa koordinasyon ng District Intelligence Division (DID-SPD) at Sub-Station 7 ng Pasay City Police Station ang tatlong suspek at nakumpiska ang P680,000 na halaga ng umano’y shabu sa ikinasang buy-bust operation sa 491 River Side Street, Barangay Maricaban sa nasabing lungsod.

Ang mga naarestong suspek ay kinilalang sina alyas “Carlo,” 28-anyos, delivery rider; alyas “Eduardo,” 47-anyos, e-bike driver; at alyas “Ma. Fe,” 23-anyos.

Ayon sa ulat, isinagawa ang operasyon sa pangunguna ni Maj Cecilio G. Tomas Jr. ng DDEU-SPD sa nabanggit na lugar kung saan nakabili umano ng droga ang police poseur buyer sa suspek na si alyas Carlo na nagresulta ng pagkaaresto ng mga suspek.

Nakumpiska ng otoridad ang tinatayang kabuuang 100 na gramo ng umano’y shabu at buy-bust money.

Isasailalim sa inquest proceedings ang tatlong suspek para sa kasong paglabag sa Comprehensive Dangerous Drugs Act of 2002 sa Pasay Prosecutor’s Office.

Pinuri ni SPD District Director BGen Manuel J. Abrugena ang matagumpay at epektibong operasyon na nagbigay-diin sa hindi natitinag na pangakong pagpapatupad ng batas upang buwagin ang mga aktibidad ng ilegal na droga at tiyakin ang kaligtasan at seguridad ng komunidad. (Bhelle Gamboa)