3 Pinoy na ginawang scammer sa Cambodia na-rescue ng InterPol

Binigyang-importansiya ni National Bureau of Investigation (NBI) Director Jaime Santiago ang malaking tulong ng International Police sa operasyon upang ma-rescue ang tatlong Pilipino na nalinlang na maging scammer sa Cambodia.

Sinabi ni Santiago na patunay ito ng pakinabang ng Pilipinas sa InterPol na una nang binanggit ni Pangulong Ferdinand Marcos Jr. nang maaresto si dating Presidente Rodrigo Duterte.

Nauna rito, nagpasaklolo ang tatlong Pinoy sa Cambodia matapos silang gulpihin ng kanilang recruiter at sabihan silang magiging mga empleyado ng isang call center doon.

Subalit hindi pumayag ang tatlong Pinoy nang malaman nilang gagawin silang scammer dahilan upang danasin ang umano’y torture mula sa kamay ng mga Chinese sa scam farm sa Cambodia.

Nang matanggap ng NBI ang paghingi ng tulong ng tatlong kababayan ay agad nakipag-ugnayan ang ahensiya sa InterPol na agad nagsagawa ng rescue operation.

Matagumpay na narescue at ligtas namang naiuwi sa bansa ang tatlong Pinoy kung saan iprinisinta ang mga ito sa mga mamamahayag. (Bhelle Gamboa)