Kumpanyang ilegal na nag-aalok ng trabaho sa USA bilang aircraft mechanics, ipinasara ng DMW

Ipinasara ng Department of Migrant Workers (DMW) ang isang kumpanya na sangkot sa ilegal na pagre-recruit ng mga aplikante patungong Estados Unidos.

Isinilbi ng DMW ang closure order sa tanggapan ng AEROSTRATEGIES INC. sa Mabalacat City, Pampangamatapos matuklasan na hindi ito lisensyado.

Ayon sa Migrant Workers Protection Bureau (MWPB) ng DMW, nag-aalok ng trabaho ang kumpanya bilang aircraft mechanics sa Texas, USA, at nangangako ng sweldong $3,344 o P193,500 sa kabila ng kawalan ng karampatang otorisasyon.

Sinabi ni DMW Secretary Hans Leo Cacdac, nagpapanggap ang kumpanya bilang aviation consultancy.

Isinailalim na din sa blacklist ng DMW ang kumpanya at hindi na papayagan na makalahok sa anumang overseas recruitment activities.

Inirekomenda na din ng DMW ang pagkansela sa business permit ng kumpanya sa Mabalacat City LGU at pagbawi ng kanilang registration sa Securities and Exchange Commission (SEC). (DDC)