Pagharap ni dating Pang. Duterte sa pagdinig ng ICC tuloy na ngayong araw

Tuloy ang pagharap ni dating Pangulong Rodrigo Duterte ngayong sa Pre-Trial Chamber I ng International Criminal Court (ICC).

Sa update mula sa ICC, gaganapin ang pre-trial alas 2:00 ng hapon oras sa The Hague, alas 10:00 naman ng gabi, oras sa Pilipinas.

Ayon sa ICC, sa isasagawang initial appearance hearing, magkakaroon ng pag-beripika sa identity o pagkakakilanlan ng suspek at aalamin ang lenggwaheng nais na gamitin ng dating pangulo sa kasagsagan ng proceedings.

Ipababatid din sa kaniya ang kasong kinakaharap niya at ipagbibigay-alam ang kaniyang Karapatan sa ilalim ng ICC Rome Statute.

Ang Pre-Trial Chamber I ay binubuo nina Judge Iulia Antoanella Motoc (Presiding judge) at Judges Reine Adélaïde Sophie Alapini-Gansou at María del Socorro Flores Liera.

Maaaring mapanood sa pamamagitan ng webstreaming sa website ng ICC na mayroon lamang 30-minute delay.

Dadalo din sa pagdinig ang mga miyembro ng diplomatic corps at civil society.

Kung mayroong nais na dumalo sa pagdinig, maaari ding mag-request sa pamamagitan ng pagpapadala ng email sa ICCVisits@icc-cpi.int bago sumapit ang alas 11:00 ng umaga oras sa The Hague.

Ang mga dadalo ay kailangang madala ng valid passport o valid ID na may picture.

Ang mga mamamahayag naman nan ais mag-cover ng hearing ay kailangang magpa-accredit sa via email sa PublicAffairs.Unit@icc-cpi.in.

Kailangan din nilang magpakita ng balidong press card, valid passport o valid ID na may picture sa main entrance ng korte.

Ang mga dadalo ay pinapayuhang dumating sa korte 20-minuto bago ang pagsisimula ng pagdinig. (DDC)