Titser patay sa saksak ng mister sa paaralan sa Las Piñas City

Patay ang isang guro matapos pagsasaksakin mismo ng kanyang mister sa loob ng pinapasukan nitong pampublikong paaralan sa Las Piñas City.

Ang biktima ay kinilalang si Rose Dizon y Morillo,51-anyos, teacher sa Lydia Aguilar National High School, Camia St., TS Cruz Subd, Barangay Almanza Dos sa lungsod.

Nasa kustodiya naman ng Las Piñas City Police Station ang mister ng biktima na si Dennis Dizon y Buticas,38-anyos, public coordinator services ng Bacoor, at nakatira sa Polido Compound, Panapaan 3, Bacoor Cavite.

Sa ulat ni Col. Sandro Jay Tafalla, hepe ng pulisya, naka-break ang biktima nang biglang pumasok sa faculty room ang suspek at agad pinagsasaksak ng kutsilyo ang naturang titser.

Sinamantala ng suspek ang pagpasok sa paaralan habang abala ang guwardiya.

Nabatid na 13 na taon na umanong nagsasama ang biktima at suspek.

Noong 2024 umano nahuli ng mister ang kanyang misis na may kasamang ibang lalaki.

Inihahanda ng otoridad ang pagsasampa ng kasong parricide laban sa suspek. (Bhelle Gamboa)