Mga residente ng Quezon City na dumalo sa Traslacion 2021 isasailalim sa libreng swab testing

Magsasagawa ng libreng swab testing ang Quezon City Government sa mga residente nitong dumalo sa Traslacion 2021 sa Quiapo noong January 9.

Kaugnay nito nanawagan si Quezon City Mayor Joy Belmonte sa mga deboto sa lungsod na agad magpatingin kung mayroong mararanasang sintomas ng COVID-19.44

“As a precautionary measure, we encourage our residents who attended the celebration to have themselves immediately checked for COVID-19 in our testing centers for free,” ayon kay Belmonte.

Sinabi ni Belmonte na hindi maaring isantabi ang posibilidad na maaring nagkaroon ng hawaan sa mga dumalo sa Kapistahan ng Itim na Nazareno.

Pinayuhan ni Dr. Rolly Cruz, pinuno ng City Epidemiology and Surveillance Unit (CESU) ng lungsod ang mga dumalo sa Traslacion na makipag-ugnayan na sa kanilang mga barangay lalo na kung may sintomas ng ubo at flu.

Ang mga opisyal ng barangay aniya ang magre-refer sa kanila sa pinakamalapit na testing center para maisailalim sila sa libreng swab test. (D. Cargullo)