Japanese scammer nadakip ng BI sa Makati City

Inanunsyo ng Bureau of Immigration (BI) ang pagkaaresto ng isa pang Japanese fugitive na matagal nang pinaghahanap ng otoridad sa Tokyo dahil sa pagkasangkot sa telecommunications fraud sa Japan.

Sinabi ni Immigration Commissioner Joel Anthony Viado na naaresto ng mga operatoba ng BI-Figitive Search Unit (FSU) si Eiji Shigematsu, 48-anyos, nitong Pebrero 7 sa Ayala Avenue, Bel Air Village, Makati City.

Ayon pa kay Viado dinakip si Shigematsu sa pinagtibay na mission order na kanyang inisyu nang matanggap ang impormasyon mula sa Japanese government ang kinaroroonan nito sa Pilipinas.

“We will deport him and he will be blacklisted and banned from reentering the country,” sabi Viado.

Batay kay BI-FSU chief Rendel Ryan Sy, si Shigematsu ay may arrest warrant mula sa Kajiki summary court sa Japan noong Hulyo 2024 matapos kasuhan ng theft na paglabag sa Japanese penal code.

Inakusahan si Shigematsu at kanyang nga kasabwat ng running voice phishing operations na bumibiktima ng marami nilang kababayan.

Ang mga suspek ay nagpapanggap umanong mga pulis upang makakuha ng pera sa kanilang mga biktima.

Bagamat hindi parte ng ‘Luffy’ gang,naniniwala ang otoridad na si Shigematsu at mga kasabwat nito ay pawang nag-ooperate ng katulad na panggagantso sa mas maliit lamang na bilang.

Dinala si Shigematsu sa BI warden facility sa Camp Bagong Diwa, Taguig City habang inaayos pa ang proseso ng kanyang deportasyon.

Lumilitaw sa travel records ng suspek na sobra na ang paninirahan o overstaying na siya sa Pilipinas kung saan ang huling pagdating niya sa bansa noong Oktubre 18, 2019. (Bhelle Gamboa)