Illegal recruiter na nangangako ng trabaho sa Canada, arestado sa Pasay City

Naaresto ng mga otoridad ang isang illegal recruiter na nangangako ng trabaho sa Canada.

Sa joint entrapment operation na ikinasa ng Department of Migrant Workers (DMW) at ng PNP-Criminal Investigation and Detection Group (CIDG), nadakip angnangangalang Edmel Jane Dumrique Movida.

Ayon sa Migrant Workers Protection Bureau (MWPB), nangangako si Movida ng trabaho bilang farmworkers sa Canada kahit wala itong karampatang lisensya o otorisasyon mula sa DMW.

Sinabi ni MWPB Director Geraldine Mendez na ang pagdakip kay Movida ay kasunod ng apat na reklamo mula sa mga aplikante na pinangakuan ng trabaho sa Canada at tatanggap ng sweldong 34 Canadian Dollar per hour.

Ang mga biktima ay sinisingil ng P120,000 hanggang P160,000 bilang processing fee.

Ang mga nagreklamo ay mula sa lalawigan ng Aklan, Quirino, Ilocos at Sultan Kudarat.

Nakakulekta na si Movida P70,000 mula sa bawat biktima at hinihingan pa sila ng dagdag na P50,000 para sa pagproseso ng kanilang visa.

Bago muling magbayad ay dumulog sa DMW ang mga biktima at doon nila nalaman na ang suspek ay walang lisensya para mag-recruit.

Hinimok ng DMW ang iba pang posibleng nabiktima ni Movida na magtungo sa ahensya. (DDC)