Pagproseso sa pag-uwi sa bansa ni Mary Jane Veloso inumpisahan na sa Jakarta

Nasa Jakarta, Indonesia na si Mary Jane Veloso para sa pagproseso ng kaniyang pag-uwi sa Pilipinas.

Sa pahayag ng pamilya Veloso na ipinadala sa mga mamamahayag ng National Union of Peoples Lawyers (NUPL), na hindi natuloy ang pagbisita ng pamilya kay Mary Jane noong Linggo (Dec. 15).

Ito ay matapos na makatanggap sila ng abiso mula sa DFA Office of the Undersecretary for Migration Affairs (OUMA) na hindi na matutuloy ang pagbisita kay Mary Jane sa Yogyakarta, Indonesia na dapat ay nakatakda mula December 16 hanggang December 18.

Ayon sa DFA, bibiyahe na kasi si Mary Jane papuntang Jakarta para simulan ang proseso ng kanyang pag transfer sa Pilipinas, alinsunod sa utos ng Indonesian Ministry for Law, Human Rights, Immigration and Corrections.

Nakasaad sa pahayag na wala pang eksaktong petsa ng pag-uwi sa bansa ni Mary Jane.

Sa kabila ng hindi natuloy na pagbisita, sinabi ng pamilya Veloso na masaya sila dahil nangangahulugan itong nalalapit ng umuwi ng bansa si Mary Jane. (DDC)