Pamunuan ng hotel kung saan natagpuang walang buhay si Christine Dacera pinagpapaliwanag ng DOT

Nagpalabas ng show cause order ang Department of Tourism (DOT) sa pamunuan ng City Garden Grand Hotel sa Makati City.

Sa nasabing hotel nakita ang walang buhay na flight attendant na si Christine Dacera.

Sa kautusan ng DOT na nilagdaan ni DOT Regional Director Woodrow Maquiling Jr., pinagpapaliwanag ang pamunuan ng hotel dahil sa ilalim ng umiiral na general community quarantine, hindi ito dapat nagbibigay ng “accommodation for leisure purposes”.

Inatasan ng DOT ang pamunuan ng hotel na magsumite ng paliwanag sa loob ng tatlong araw pagkatanggap ng show cause order.

Kailangang ipaliwanag kung bakit hindi dapat suspindihin o bawiin ang kanilang DOT accreditation dahil sa paglabag sa umiiral na administrative orders at memorandum circular ng DOT. (D. Cargullo)